İranda gecə şənliyinə qatılan 110 qız və oğlan tutulub

İranın Məşhəd şəhərində gecə şənliyinə qatılan daha 110 qız və oğlan tutulub. Hadisə dörd gün əvvəl baş versə də, bu barədə məlumat yenicə yayılıb.

İrandakı hüquq müdafiəçilərinin yaydığı məlumata əsasən, hadisə iyunun 28-i axşam saatlarında baş verib. Bildirilir ki, Məşhədin Firdovsi bulvarına yaxın “Şahnamə” məntəqəsindəki bir bağ evində keçirilən qonaqlığa qatılan və birlikdə rəqs edərək xoş anlar keçirən gənclər “əxlaq təhlükəsizliyi polisi”nin qəfil hücumana məruz qalıb. Polisin həmin bağa basqını nəticəsində 110 qız və oğlan tutularaq naməlum istiqamətə aparılıb, onların bir sıra şəxsi əşyaları, o cümlədən də mobil telefonları götürülüb. Həmçinin bağ evində yoxlama aparıldığı, qonaqlar üçün nəzərdə tutulan alkoqollu içkilərin aşkarlanaraq müsadirə edildiyi vurğulanır. Yaxalan gənclərin hazırda harda saxlanıldığı barədə məlumat yayılmayıb.

Xatırladaq ki, 2016-cı ilin iyun ayından bu günə kimi, İranın müxtəlif şəhərlərində polisin qız və oğlanların birgə qatıldığı gecə qonaqlıqlarına, banketlərə və ad günü mərasimlərinə hücumunda ən azı 1435 nəfərdən çox adam həbs edilib.