İsrail ordusu hücuma hazırlaşır — QORXUNC İDDİA

ABŞ prezidenti Donald Trampın Qüds şəhərini İsrailin paytaxtı kimi tanıdığını elan etməsindən sonra İsrailin şok həmləyə əl atdığı barədə xəbərlər yayılıb.

Turkustan.info xəbər verir ki,  “Haaretz” qəzeti İsrail ordusunun Şərqi Qüdsdəki bəzi nöqtələri hədəf aldığını iddia edib. Məlumata görə, hazırda bölgədə yeni hərbi əməliyyatların başlanmasına hazırlıq işləri görülür.

Fələstinlilərə qarşı hazırlanan əməliyyatların yaxın vaxtlarda reallaşacağı bildirilir.

İsrail hökuməti yayılan xəbərlərə hələlik heç bir münasibət bildirməyib.

Qeyd edək ki, ABŞ Prezidenti Donald Tramp Amerikanın Qüds şəhərini İsrailin paytaxtı kimi tanıdığını elan edib. O bildirib ki, Qüdsü (Yerusəlim) İsrailin paytaxtı kimi tanımağın vaxtı gəlib çatıb.

“Qərara gəldim ki, Qüdsün İsrailin paytaxtı kimi tanınmasının vaxtı gəlib çatıb. Amerika bu addıma qarşı deyil və Qüdsü İsrailin paytaxtı kimi tanıyacaq”, – deyə D.Tramp vurğulayıb.

Onun bu qərarını bir çox ölkələr hiddətlə qarşılayıblar. Bu qərarından sonra həm Avropa ölkələrindən, həm Yaxın Şərq, həm də Ərəb dövlətlərindən Trampa etirazlar gəlib. İlk etiraz isə Fransa prezidenti tərəfindən dilə gətirilib. Daha sonra Türkiyə və İran Trampın bu qərarını pisləyib. İordaniya da ABŞ prezidenti Donald Trampı beynəlxalq qətnamələri pozmaqda günahlandırıb. Verilən açıqlamada bildirilib ki, Trampın bu qərarı siyasi səhvdir. Misir hökuməti də Trampın yeni bəyanatını xoş qarşılamayıb. Qeyd olunub ki, onun bu addımı həm Amerika, həm də region üçün yaxşı nəticə  vəd etmir.     /Ölkə.Az/