Rus təbliğatı: Avropanı təhdid altında saxlayır

Avropa Komissiyası Rusiyanı Avropa İttifaqını parçalamaq məqsədilə əlaqələndirilmiş “dezinformasiya kampaniyası” aparmaqda ittiham edib və bu təhlükənin qarşısının alınması üçün tədbirlərin artırılmasına çağırış edib.Komissiyadan edilən çağırışda bildirilir ki, Rusiyanın maraqlarına xidmət edən dezinformasiyalara, saxta xəbərlərə, dezinformasiya kampaniyalarına və kiberhücumlara Avropa İttifaqı tərəfindən olan etinasızlığa təəssüf edirlər.Avropalı parlamentarilər 2016-cı ildə Böyük Britaniyada Avropa İttifaqından çıxmaqla bağlı keçirilmiş referendum, habelə Fransa, Almaniya və İspaniyada keçirilən seçkilərə Rusiyanın rahatlıqla müdaxilə etməsinin bu kampaniyaların nəticələri olduğunu deyirlər.

Qeyd edək ki, Aİ Rusiyanın dezinformasiya kampaniyasına qarşı 2015-ci ilin sentyabr ayında “Şərqi Strateji Rabitə” adlı işçi qrupu yaradıb.Bu, “Şərq Tərəfdaşlığı” proqramı çərçivəsində Rusiya təbliğatına qarşı Aİ ilə əməkdaşlığın gücləndirilməsini nəzərdə tutur.

Avropalı deputatlardan Rusiyaya qarşı yeni təklif

Avropa İttifaqının təhlükəsizlik məsələləri üzrə komissarı Julian King Avropa Rusiyanın lehinə aparılan dezinformasiya kampaniyaları barədə danışarkən deyib ki, “Şərqi Strateji Rabitə” qrupu son 2 il ərzində Rusiya ilə bağlı 3500-dən çox dezinformasiya aşkar edilib. Kinq qeyd edib ki, bu dezinformasiyalar Rusiya tərəfindən müxtəlif dillərə tərcümə edilib.Digər avropalı deputatlar da Rusiyanın təbliğat vasitələrinə qarşı müqavimətin gücləndirilməsi məqsədilə KİV-lərdə bununla bağlı maarifləndirici məlumatların sayının artırılmasını, aşkarlığın artırılmasını və araşdırmaçı jurnalistlərə diqqətin ayrılması kimi tədbirlərin həyata keçirilməsini təklif ediblər.Artıq yanvarın 15-də Avropa Komissiyasının ekspertlər qrupu ilk dəfə olaraq Rusiya ilə bağlı dezinformasiyalarla mübarizəni müzakirə etmək üçün bir araya gəlib.Qrup görüləcək təbirlər planını və tövsiyələri aprel ayında təqdim edəcək.

Azərbaycana edilən çağırış

Keçən ilin son günlərində Avropa İttifaqı Rusiyanın qitə ölkələrinin media qurumlarında yaydığı dezinformasiyalar və apardığı təbliğatlarla mübarizə üçün 1 milyon avro dəyərində büdcə ayırmaq barədə qərar qəbul edib.Artıq Aİ bununla bağlı yeni maliyyə mənbəyi axtarışına çıxıb.İlk dəfə 2015-ci ildə “Şərqi Strateji Rabitə” adı altında təqdim olunan layihəyə Avropa İttifaqının büdcəsindən də pul ayrılacaq. Layihə ilə əlaqədar yaradılmış qurumun fəaliyyəti üçün 2018-2020-ci illər dönəmində Aİ-nin büdcəsindən hər il 1.1 milyon avro həcmində vəsaitin ayrılması bu plana daxildir. 

Məsələ Avropa Şurasının prezidenti Donald Tuskun Avropa dövlətlərinin kiber hücumlar və “hibrid müharibə” qarşısında qalması ilə bağlı açıqlamasından sonra gündəmə gəlib. Tusk Aİ dövlətlərini və ittifaqla əməkdaşlıq edən Cənubi Qafqaz ölkələrini (Azərbaycan, Ermənistan və Gürcüstan) də bu təhdidlərə qarşı mübarizəyə, birləşməyə çağırıb. Qeyd edilir ki, xüsusilə, İspaniyanın Kataloniya bölgəsində keçirilən müstəqillik referendumundan sonra Rusiya tərəfindən yerli və xarici KİV-lərdə bununla bağlı yalnış və təxribatçı informasiyaların yayılması Aİ-ni dezinformasiyalar və separatizmi qızışdıran təbliğatlara qarşı hərəkətə keçməyə məcbur edib. Həmçinin vurğulanır ki, Rusiyanın KİV-lərdə Ukrayna, Moldova, Gürcüstan və digər dövlətlərdəki separatçı fəaliyyətlərini dəstəkləyən informasiyaların belə bir fondun təsis edilməsində güclü təsirləri olub.

Avropanın strateji planı

Avropa Parlamenti də Rusiyanın ayrı-ayrı dövlətlərdə keçirilən seçkilərə müdaxilələrinin qarşısının alınması və bu yöndə yayılan dezinformasiyalarla mübarizə məqsədilə 4 maddəlik sənəd qəbul edib.Sənəd yanvar ayının 17-də Strasburqda Rusiya təbliğatının Aİ ölkələrinə qarşı təsirləri mövzusu ətrafında keçirilən toplantıda təqdim olunub.Avropa Parlamentinin Xarici Əlaqələr Komitəsinin başçısı David MakAllister bildirib ki, Rusiyanın dezinformasiya kampaniyası Avropada söz azadlığına qarşı ağır zərbədir.Aİ-nin Rusiyanın bu kampaniyasına qarşı dayanıqlığının artırılmasına ehtiyacın olduğunu deyən MakAllister qeyd edib ki, bununla bağlı qəbul edilmiş sənəddəki prinsipləri (4 addımı) həyata keçirmək lazımdır.Aİ-dən təklif edilib ki, təbliğatın qarşısının alınması məqsədilə ilk növbədə Rusiyanın seçki kampaniyalarına müdaxilələri dəqiqliklə araşdırılmalıdır.Kiber hücum və təhrif edilən məlumatların yayılmasına qarşı isə sanksiyaların tətbiq edilməsi təklif edilib.

Kommunikasiyaların inkişaf etdirilməsi və Avropa dəyərlərinin yayılması ilə bağlı strateji planın hazırlanması da bura daxildir.Bununla bağlı işçi qrupuna (“East StratCom Task Force”) ayrılmış maliyyə vəsaitinin artılması planlaşdırılır.    /Cebhe.info/