Ca. İyl 18th, 2019

Ermənistanın yeni prezidenti: “Sülh göyərçini”, yoxsa?

Ermənistanın yeni seçilmiş prezidenti Armen Sarkisyan hələlik səlahiyyətlərinin icrasına başlamayıb.

Bu posta aprelin 8-dək hazırkı dövlət başçısı Serj Sarkisyan rəhbərlik edəcək.

Aprelin 11-dən sonra isə parlamentdə keçiriləcək baş nazir seçkilərindən sonra  hökumətə rəhbərlik yeni baş nazirə keçəcək. Bu, Ermənistanda prezident postunu formal səviyyəyə endirəcək.

Ermənistan – Azərbaycan (Dağlıq Qarabağ) münaqişəsi üzrə gedən danışıqlara kimin rəhbərlik edəcəyinə gəlincə, hökumət başçısı kimi danışıqlarda baş nazir iştirak edəcək.Prezident isə Konstitusiya ilə müəyyən edilmiş səlahiyyətləri və parlamentin, yaxud, hökumətin qarşıya qoyduğu tapşırıqları icra edəcək.Armen Sarkisyanın qarşısına qoyulmuş tapşırıqlar da məlumdur. Hələ bir neçə gün əvvəl keçirilmiş prezident seçkilərinə bir neçə ay qalmış Serj Sarkisyan açıqlama verərək bildirmişdi ki, yeni prezident xarici ölkələrdə tanınmış və erməni diasporu ilə işləyə biləcək diplomatlar arasından seçilsə, bu, dövlətin prioritet elan etdiyi məsələlərin həllində məqsədəuyğun hesab edilərdi. Həmin vaxt Serj Sarkisyanın bu posta namizədinin Armen Sarkisyan olduğunu nəzərə alsaq, seçkilərdə bu şəxsin seçiləcəyinə əvvəldən şübhə yox idi.

Armen Sarkisyan – “sülh göyərçini”, yoxsa….

Açıq formada ifadə etsək, Ermənistanın Böyük Britaniyadakı keçmiş səfiri və Avropa İttifaqı dövlətlərində tanınmış diplomat kimi Armen Sarkisyanın bu posta gətirilməsi təsadüfi deyildi. Bu baxımdan, həmin şəxsin xarici ölkələrdəki erməni diasporu ilə işğal edilmiş Qarabağla bağlı separat fəaliyyətini nəzərə alsaq, Armen Sarkisyan münaqişə tərəfləri arasındakı gərginliyin azaldılması işində “sülh göyərçini” missiyasını yerinə yetirəcəyi inandırıcı gəlmir. 

Əvvəldən də Azərbaycanın belə bir gözləntisi yox idi. Armen Sarkisyanın Dağlıq Qarabağın birmənalı şəkildə Ermənistanın tərkibində qalmasını dəstəkləyən Serj Sarkisyanın namizədi olduğunu və onun seçildikdən dərhal sonra Qarabağdakı separatçılara verdiyi dəstəyi də bura əlavə etsək, o, bölgədə sülhyaratma missiyasının təmsilçisi kimi yox, Ermənistanın separat hökumətinin “qızışdırıcı katalizator”larından biri kimi qabağa çıxacağına şübhə yoxdur. 

Yeni prezidentin qarşısına qoyulmuş əsas missiya

Vəhdət Partiyası sədrinin müavini, politoloq Vasif Əfəndi “Cümhuriyət” qəzetinə açıqlamasında bildirib ki, Ermənistanda keçirilən sonuncu prezident seçkilərini mahiyyət etibarilə, yeni bir idarəçilik sisteminə keçid kimi qiymətləndirmək olar. Politoloq qeyd edib ki, Armen Sarkisyanın prezidentliyinin formal xarakter daşıyacağı iddia edilsə də, bunun belə olmayacağı dəqiqdir: “Armen Sarkisyan kifayət qədər tanınmış və geniş əlaqələri olan siyasətçidir. O, Avropada daha çox qəbul olunan parlamentli dövlət sistemindən yararlanmağa çalışaraq, Qarabağ probleminin həllində Qərbdən dəstək almağa çalışacaq. Artıq Armen Sarkisyan bu istiqamətdə fəaliyyətə başlayıb.

Onun atacağı addımlardan birincisi, Dağlıq Qarabağa danışıqların getdiyi ərəfədə keçici və müvəqqəti hüquqi status almağa çalışmaq olacaq.Artıq dünyanın bir neçə böyük dövlətində qondarma respublikanın “nümayəndəlikləri” yaradılıb.Bu “nümayəndəliklər” səfirlik statusu almağa çalışırlar.Rusiya və Fransada fəaliyyət göstərən bu “nümayəndəliklər” xüsusi aktivlik göstərirlər.Əslində bütün bunlar hiyləgər bir gedişdir və danışıqlarda separatçı rejimin tərəf kimi iştirakına zəmin yaratmaqdır”.

Vasif Əfəndi hesab edir ki, Armen Sarkisyanın prezidentliyi dövründə Azərbaycana kifayət qədər problemlər yarada biləcək gedişlərlə qarşılaşacağıq: “Lakin Yaxın Şərqdə baş verən proseslər Ermənistanın da xeyrinə deyil. Türkiyənin uğurlu hərbi əməliyyatları region ölkələrinin “kürkünə birə salıb”.Hərbi əməliyyatlar zamanı yüksək peşəkarlıq və humanizm sərgiləyən türk ordusunun indiyə qədər belə miqyasda keçirilmiş döyüşlərdə həm hərbçilərin, həm də mülki insanların həyatlarını maksimum sığortalaması dünya üçün yeni nümunə oldu”.    /Cebhe.info/