Seulda və Bakıda: Təsirli mənzərə… – Foto

İki ağac paylaşıram: Birinci ağacı keçən il Cənubi Koreyanın paytaxtı Seul şəhərində çəkmişəm. Ağac sozalmağa başlayıb, hansısa budağı quruyur. Şəhər bələdiyyəsi tərəfindən ağac yüksək qoruma altına alınıb, ağaca sistem köçürürlər. Ağacın müalicə aldığı bölgədə yüksəkdən danışmamaq, səs salmamaq, ağacın dibinə maye tökməmək xahiş olunur. Bu mənzərəni görəndə heyrətlənmişdim açığı. Baxmayaraq ki, şəhər başdan-ayağa yaşıllıqlar içərisindədir, lakin bununla belə, bir budağın belə qurumasına dözmür koreyalılar.

İkinci ağac isə Bakının Yasamal rayonu Şərifzadə küçəsində yerləşən yaşıllıq zolağında çəkilib. 10 ədəd şam ağacının dibinə zərərli maddə – sulfat turşusu tökərək onu qurutmağa çalışıblar. Əlbəttə, bunu edən şübhəli şəxs Zəngilan rayonundan məcburi köçkün olan və hazırda Yasamal rayonu ərazisində yaşayan Real Göyüşov şübhəli şəxs qismində saxlanılıb. Ona Yasamal rayon Polis İdarəsinin istintaq şöbəsində Cinayət Məcəlləsinin 260.2-ci (meşələri ümumi təhlükəli üsulla məhv etmə) maddəsi ilə cinayət işi də başlanılıb. Hesab edirəm ki, bu şəxs sadəcə icraçı olub, kimlərsə bu adamı qabağa verib, ağacları onun vasitəsilə qurutduracaq, sonra o ağacların yerində kimlərsə göydələnlər ucaldacaq.

Bəlkə də kimlərsə Koreya ilə Azərbaycanı belə bir müqayisəmi qüsurlu saya bilər. Amma mən yüksək inkişaf etmiş bir çox ölkələrdə olarkən müşahidə etmişəm ki, bu inkişafın mənbəyində həm dövlətin, həm də cəmiyyətin bütün fərdlərinin öz ölkələrinin təbii resurslarına, təbii qaynaqlarına anlayışlı və sayğılı münasibətləri durur. Ağaclar, yaşıllıqlar bir ölkənin sadəcə ağciyərləri deyil, həm də qüruru, o toplumun dünyagörüşü, Tanrıya münasibəti, Vətənə sevgisidir! Xatırlayırıqmı görəsən, 30 il öncə Qarabağda – Topxana meşəsində ağaclarımıza balta qaldıranlara qarşı millət olaraq necə dirənmişdik, necə ayaqlanmışdıq?!

Məncə, Bakının iqlimini, ağac yetişdirməyin çətinliklərini də nəzərə alaraq, ağac kəsənlərə insanı qətlə yetirənlərlə eyni cəzanı verməliyik!..

101 Baxılıb