Türk dünyasının vətəndaş cəmiyyəti institutlarının durumu Bakıda müzakirə ediləcək

Dünya Gənc Türk Yazarlar Birliyi (DGTYB) tərəfindən düzənlənən, Azərbaycan Prezidenti yanında QHT-lərə Dövlət Dəstəyi Şurasının dəstəklədiyi layihə çərçivəsində qardaş türk ölkə və topluluqlarının bir qrup yazarı respublikamıza gəlir.
Fəxri Xiyaban, Şəhidlər Xiyabanı və Bakı Türk Şəhidliyini ziyarət edəcək qardaş ölkə və topluluq təmsilçiləri, paytaxt Bakı və “gənclər şəhəri” Sumqayıtın görməli yerləri ilə tanış olacaq, müxtəlif tədbirlərdə iştirak edəcək. 
26 avqustda (başlanır: saat 11.00) müvəqqəti olaraq Sumqayıtda yerləşən Qubadlı Mədəniyyət Evində AYB-nin Qubadlı bölgə təşkilatının evsahibliyi ilə qardaş ölkə və topluluq təmsilçisi olan yazarlarla görüş keçiriləcək. Görüşdə Saxa (Yakutiya) Yazıçılar Birliyinin başqanı Natalya Xarlampyevanın bugünlərdə Bakıda gün üzü görmüş kitabı əsasında Qubadlı məktəblilərinin hazırladığı kompazisiyalar da təqdim olunacaq. 
Həmin gün saat 15.00-da Azərbaycan Mətbuat Şurasında mətbuatımızın kapitanlarının iştirakı ilə görüş-müzakirə keçiriləcək. 
27.08.2018-ci ildə Azərbaycanda ATATÜRK Mərkəzində “Türk dünyasının vətəndaş cə¬miy-yəti institutlarının inkişaf modelləri” adlı konfrans keçiriləcək. 
Konfransda millət vəkilləri, tanınmış QHT, KİV təmsilçiləri, alimlər, yazarlar, Dövlət Dəstəyi Şurasının əməkdaşları iştirak edəcək. 
Qardaş Türkiyə, Qazaxıstan, Qırğız Respublikası, Özbəkistan, Tatarıstan, habelə Moskva (RF) və doğma Təbrizdən nümayəndələrin olacağı konfransın fəxri qonağı Saxa (Yakutiya) Yazıçılar Birliyinin başqanı, Rusiya Yazıçılar Birliyinin katibi, Xalq şairi Natalya xanım Xarlampyevadır. 
Silsilə tədbirlər çərçivəsində baş trutacaq digər görüşlər barədə ictimaiyyətə bilgi veriləcək.