Aprel şəhidinin doğum günündə – FOTOLAR

Yenə bir ana oğluna doğum günü keçirirdi. Doğum günü fərqli idi. Səbəkar özü yox idi. 25 yaşını qeyd etməyə gəlməmişdi.  25 yaşın doğum günü təntənəsinə gələnlər də hədiyyə gətirməmişdilər. Hədiyyələri Rəşad Niftalılının ata anasına  dedikləri :

“Vətən sağ olsun”, “Başınız sağ olsun” , “Məkanı cənnət olsun” sözləri idi.

Şəhid anaları ilə şəhid ataları  eyni süfrə başına yığışmışdılar. 2016-cı ilin aprel ayında şəhid olan  Əbdülməcid Axundovun,  Müşviq Orucovun,  Xaliq Əzizzadənin,  Emin  Bağırovun, Əlizaman İslamovun, Şulan Bayramovun, Fəxrəddin Qurbanlının, Mahir Sabir Mirzəyevin, Mahmud İbrahimovun , digər şəhidlərimiz Rəşad Cəfərzadənin, Zakir Cəfərovun valideynlərini eyni dərd, eyni ağrı, eyni vüqar hissi birləşdirirdi.

Rəşad Niftalılı 1993-cü ilin avqust ayında Bakının Xətai rayonunda doğulmuşdu. İki qardaş idilər.  Rəşadın adına keçirilən bugünkü məclisində onun  keçdiyi qısa ömür yolunun  şəkilləri və əlindən qalan dəftərləri, kitabları, əlinə bircə dəfə almadığı Gəncə Texnologiya Universitetinin diplomu var idi.

Çünki 2015-ci ildə universiteti bitirən Rəşad Niftalılı Vətən borcunu ödəməyə getmişdi.  Dostları, qohumları onun haqqında xatirələrini bölüşdülər.

O xatirələrin içərisində Şakir müəllimin Rəşadın əlindən tutub bağçaya apardığı gündən, universiteti bitirməsi haqqında sevinci və oğlunu Vətənə yola saldığı günlərin xatirələri var idi. Bu xatirələr vərəqləndikcə  taleyin ona verdiyi əzabla barışan Fərqanə ana və digər şəhid anaları səssiz-səssiz ağlayırdılar. Çünki bu məclisə yığılan anaların hər birinin xatirələrinin adı və dadı eyni idi. 

Hər sözdən, hər baxışdan, hər hənirtidən ağlar şəhid anaları.

Rəşadın doğum günündə Xətai Rayon icra hakimiyyətinin nümayəndələri də iştirak edirdi.  Azərbaycan Milli Məclisinin deputatları Aydın Mirzəzadə və Xanhüseyn Kazımlı da şəhidin adına olan ehtirama görə bu məclisə gəlmişdilər. Millət vəkili Xanhüseyn Kazımlı şəhid analarının fədakarlığını , Azərbaycan qadınlarının  tarixin bütün dönəmlərində  Vətəni oğullarına əmanət etdiklərini söylədi. Millət vəkili Aydın Mirzazadə  Aprel döyüşlərinin böyük türk dünyası tarixinə, Azərbaycanın qəhrəmanlıq tarixinə şəhidlərimizin və qazilərimizin qızıl qanıyla yazılan şərəfli bir tarix olduğunu söylədi. Və dedi ki, Aprel döyüşləri ermənilərin 24 il ərzində yaratdıqları  mifi dağıdaraq, Azərbaycanın oğullarının  öz torpaqları uğrunda döyüşməyə qadir olduğunu və Ordusunun gücünü göstərdilər. Bununla belə, torpaqlarımızın sülh yolu danışıqları ilə qaytarılmasının mümkün olmadığı şəraitində, Ali Baş komandan İlham Əliyevin yenə də  torpaqlarımızın qaytarılması üçün əmr verəcəyinə əmin olduğunu bildirdi. Millət vəkilləri eyni zamanda Rəşad Niftalılının valideynlərinə, eləcədə bütün şəhid ailələrinə dözüm arzuladılar.

Sonra mən də çıxış etdim. Dedim ki:

“Bu gecə döyməsin kimsə qapımı,

Qəlbim qırmayacaq öz inadını,

Sığıb dodağıma sənin adını,

Oğul, ad gününü keçircəyəm”.

Mən şəhidlərin doğmalarının çəkdikləri dərdlərini  2016-cı ildən sonra  bir daha özümünkü edib,  köynəyimdən keçirib, canıma yaxınlaşdırdım. Fərqanə xanıma, eyni süfrə arxasında əyləşdiyim digər şəhid analarına təsəlli verəcək sözüm olmasa da, bilirəm ki, “Qalibiyyət: şəhidlər və şahidlər” kitabı sizin üçün ən böyük təsəllidir.  Onu yazdım ki, Vətənimin şərəfli tarixi itməsin.  Şəhid anaları, şəhid ailələri ölkəmizdə ən başda duran, ən yüksək mərtəbəyə seçilən ailələr olmalıdır. Azərbaycan Prezidentinin şəhid ailələrinə xüsusi qayğı və ehtiramını xatırlatdım. AXC-nin 100 illiyi ilə bağlı yubileylərindən, bu yubiley ilində  şəhidlərimizin də öz qanları ilə adlarını qəhrəmanlıq tarixinə yazmalarından danışdım.

Şəhid ailələri adından Aprel şəhidi Mahir Mirzəyevin atası Sabir Mirzəyev üzünü millət vəkillərinə tutub dedi ki, şəhid ailələri üçün ən böyük təsəlli övladlarının adlarının yaşamasıdır. Çünki şəhidlər vurulduğunda deyil, unudulduqda ölürlər.  Bütün şəhid ailələri adından xahiş etdi ki, Azərbaycan tarixinə 25 ildən sonra qəhrəmanlıq  tarixi yazan şəhidlərin adlarının hər hansı küçəyə, meydana, məktəbə verilməsi üçün Milli Məclisdə daim məsələ qaldırsınlar, bu məsələlərin öz həllini tapmasında onlara yardımçı olsunlar.

Aida Eyvazlı