Gəncənin təhlükəli qaranlıqları – Sakinlər yeni başçıya müraciət etdi – VİDEO

Gəncənin mərkəzindəki yeraltı piyada keçidində əsl zülmət hökm sürür.
Turkustan.info-nun BakuPost-a istinadən məlumatına görə, söhbət şəhər əhalisinin aktiv istifadə etdiyi, Nizami Gəncəvi və Şah İsmayıl küçələrinin kəsişməsindəki keçiddən gedir. 
Gəncə sakinləri günorta saatlarında çəkilmiş fotonu saytımıza göndəriblər. Hətta, günün işıqlı vaxtlarında da keçiddən keçmək çətin və təhlükəlidir. Nəzərə alsaq ki, keçiddən şagirdlərdən də istifadə edir, problemin nə qədər ciddi olduğunu təxmin etmək çətin deyil. 
Elmar Vəliyevin Gəncə Şəhər İcra Hakimiyyətinə başçılıq etdiyi dövrdə yeraltı piyada keçidlərindəki vəziyyətlə bağlı edilən çoxsaylı şikayətlərə məhəl qoyulmayıb. Gəncənin icra başçısı dəyişdirilsə də, mənzərə dəyişməyib. 

Sakinlər bildirir ki, Gəncədəki bütün yeraltı piyada keçidlərində vəziyyət eynidir. Onlar gündüz saatlarının qısaldığı payız və qış fəsillərinin yaxınlaşdığını nəzərə alaraq, qarşıdakı aylarda piyada keçidlərindən istifadənin daha təhlükəli olacağını bildirir və tədbir görülməsini istəyirlər.

Məsələ ilə bağlı  Gəncə Şəhər İcra Hakimiyyəti başçısının birinci müavini Naqif Həmzəyev bildirib ki, problem qısa zaman ərzində həllini tapacaq.