Yeni nəsil şəxsiyyət vəsiqələri: Problemi kim və niyə yaradır?

“Yeni nəsil şəxsiyyət vəsiqələri ilə bağlı əvvələr bizim anlaşılmazlıq hesab etdiyimiz problem xeyli ciddiləşib”. 

Turkustan.info bildirir ki, bunu Cebhe.info-ya açıqlamasında Azərbaycan İnternet Forumunun prezidenti, ekspert Osman Gündüz deyib. O bildirib ki, vəsiqələrdəki “yeni nəsil” termini öz mahiyyətini doğrultmayıb:

“Verilən vəsiqələrin heç birində e-imza aktivləşdirilmir. Və ən qəribəsi də odur ki, heç kim bunun səbəbini açıqlamır. Bilinmir ki, belə anlaşılmaz situasiya nə vaxtadək davam edəcək. Ölkə başçısının siyasi iradəsi əsasında ortaya çıxan bu cür əhəmiyyətli bir layihəni belə etmək doğru deyil. Bilmirəm burada kimlərin marağı var və kimlər bu prosesdə nə məqsəd güdürlər. Amma istənilən halda uzun illər hazırlıq görülən, Prezident səviyyəsində açıqlamalar verilən, ölkədə informasiya cəmiyyətinin formalaşmasında mühüm əhəmiyyət kəsb edən bir layihəyə belə yanaşma doğru deyil. Uzun müddətdir elan olunurdu ki, e-imza ilə bağlı bütün hazırlıq işləri Nəqliyyat, Rabitə və Yüksək Texnologiyalar Nazirliyi (NRYTN) tərəfindən başa çatdırılıb. Bəs kimdir və ya kimlərdir mane olan, hansı qurumların maraq toqquşmaları var burada?” 

Ekspert həmçinin qeyd edib ki, ola bilər ki, hər ay “ASAN imza”dan 0.5 milyon manat qazanc götürənlərin maraqlarına uyğun deyil:

“Ola bilər vəsiqədə yerləşdiriləcək imzadan istifadə ilə bağlı müəyyən olunacaq rüsumun məbləği üçün razılıq əldə olunmur. Düzü , müxtəlif versiyalar olsa da, konkret fikir bildirmək çətindir. Amma problem göz qabağındadır. Reallıq isə odur ki, hələlik “yeni nəsil”in əsas atributundan əsər-əlamət yoxdur. Düşünürəm ki , ləngimədən əsas aidiyyatı qurumlar, İqtisadiyyat Nazirliyi, NRYTN, Ədliyyə Nazirliyi , DİN və digər qurumların rəhbərləri bir araya gəlib bu məsələni həll etməlidirlər. Ümid edirəm ki, bu cür xırda bir məsələnin də həlli üçün Prezidentin müdaxiləsinə ehtiyac qalmayacaq”.