Ağ Ev İrəvanla rus dilində danışacaq: Ermənistanda ABŞ-Rusiya qarşıdurması arta bilər

ABŞ prezidenti Donald Tramp Ermənistanda səfir vəzifəsinə öz namizədini irəli sürüb.

Turkustan.info xəbər verir ki, bu, Rusiya və keçmiş SSRİ ölkələri üzrə mütəxəssis Linn Treysidir.

Ağ Evin mətbuat xidmətindən verilən məlumata görə, Treysi nüfuzlu diplomatdır, hazırda Dövlət Departamentində Rusiya üzrə baş məsləhətçidir. Buna qədər isə

Moskva, Aşqabad, Astanadakı səfirliklərdə işləyib. Rus dilini yaxşı bilir.

Xanım Treysi Pakistanın Pişəvər şəhərindəki fəaliyyətinə görə isə “İgidliyə görə” medalı alıb. Onun namizədliyi təsdiqlənmək üçün ABŞ Senatına təqdim edilib. 
ABŞ-Rusiya münasibətlərinin hazırkı səviyyəsini  nəzərə alsaq, Linn Treysinin Ermənistana səfir təyin edilməsi  diqqəti cəlb edir. Dövlət Departamentində  Rusiya üzrə baş mütəxəssis vəzifəsini tutan diplomatın İrəvana göndərilməsi yaxın perspektivdə Ermənistan üzərində Birləşmiş Ştatlarla Rusiya arasındakı geosiyasi qarşıdurmanın dərinləşəcəyini istisna etmir. Hətta bu rəqabətin coğrafi dairəsinin artaraq bütünlükdə Cənubi Qafqazı əhatə edəcəyi  proqnozlaşdırılır. 

Məsələni  “Cümhuriyət” qəzetinə şərh edən politoloq Qabil Hüseynli hesab edir ki, Linn Treysinin İrəvana səfir göndərilməsi Ermənistanda və Cənubi Qafqazda ABŞ-ın Rusiyaya qarşı fəallaşmasına səbəb olacaq. Bu da həm xanım Treysinin anti-Rusiya mövqeyə malik olması, həm də Tramp administrasiyasının Cənubi Qafqaz və Mərkəzi Asiya siyasəti ilə bağlıdır: “Linn Treysi keçmiş SSRİ respublikalarını, yəni post-sovet məkanını yaxşı bilir. Hər halda, Dövlət Departamentində post-sovet məkanı, o cümlədən Rusiya üzrə baş mütəxəssis hesab edilirdi. Hazırda Amerikaya Rusiyanı, post-sovet məkanını gözəl bilən, Rusiyanın bu regiondakı siyasətini yaxşı təhlil etməyi, praktiki tövsiyələr verməyi bacaran mütəxəssislər lazımdır. Bu səbəbdən, Ermənistana təyin edilən səfir ABŞ Dövlət Deraprtamentində ən ixtisaslı mütəxəssislərdən biri  sayılırdı.

Onun səfir təyin edilməsi post-sovet məkanında Ermənistanın Rusiyanın sağ əli olması ilə bağlıdır. Keçmiş SSRİ ərazisində Ermənistan yeganə ölkədir ki, onun ərazisində NATO-ya qarşı Rusiyanın hərbi bazaları var. Bunlar Gümrüdə böyük hərbi kontingentə malik tank və quru qoşunları bazası, Erebunidəki  hərbi hava bazasıdır. Yəni, məsələ yalnız Ermənistanla bağlı deyil. Səfir Treysi Rusiyanın post-sovet məkanındakı analizlərini və tövsiyələrini yəqin ki, Dövlət Departamentinə göndərəcək. Onu anti-Rusiya meyilli diplomat hesab edirlər. O, Rusiyanın post-sovet məkanındakı  qanunsuz siyasətini yaxşı başa düşür və buna qarşı tövsiyələrini verir. Linn Treysinin səfir təyin edilməsi də Ermənistana olan diqqətdən yox, Ermənistanın Rusiyaya yaxınlığı ilə bağlıdır. Ona görə də ABŞ-ın Rusiyadakı səfirliyi ilə birlikdə yəqin ki, hesabatlar hazırlayıb Dövlət Departamentinə təqdim edəcəklər”. 

Qabil Hüseynli qeyd edir ki, prezident Trampın açıqlamaları ABŞ-ın Cənubi Qafqazda fəallaşmaq niyyətindən xəbər verir. Həmin plan Rusiyanı təcrid etmək üçün hətta Mərkəzi Asiyanı da əhatə etməyi nəzərdə tutur: “Yəqin Azərbaycana göndərilən yeni səfir də belə mövqeyə malik diplomat olacaq. Hələ Barak Obamanın prezidentliyi dövründə ABŞ-ın belə bir planı mövcud idi. Lakin Obama riskə getməyi sevmirdi və Rusiya ilə qarşıdurmadan çəkinirdi. Amma Tramp administrasiyası Rusiya ilə bütün kartları açıq oynayır.

Rusiyaya qarşı açıq mövqe nümayiş etdirilir. Dünya siyasətində belə bir yanaşma var ki, Rusiyanı üstələmək üçün Cənubi Qafqazda və Mərkəzi Asiyada  onun mövqeyini zəiflətmək lazımdır. Bu bölgələrdə hakim olan dövlət Rusiyanın bel sütununu sındıra bilər. Çünki ABŞ Rusiya və Çinin münasibətlərinin strateji  forma almasını istəmir. Amerika  və NATO-nun  planlarına görə, Rusiya ilə Çin, eləcə də Rusiya ilə Yaxın Şərq arasında əlaqəni kəsmək üçün Cənubi Qafqazda və Mərkəzi Asiyada maneə divarının hörülməsi  həyata keçiriləcək”.   /Cebhe.info/