“Xaricə yumurta satsaq, adama söyərlər” – Quşçular Cəmiyyəti: “Yumurta qıtlığı aradan qalxıb”

Təxminən bir aya yaxındır ki, yumurta qıtlığı ilə bağlı müzakirələr səngimək bilmir. Bəziləri mağaza və marketlərdə yumurta qıtlığından, bəziləri də qiymətin bahalığından gileylidir.

Turkustan.info bildirir ki, məsələ ilə bağlı Modern.az-a danışan Respublika Quşçular Cəmiyyətinin sədri Aydın Vəliyev bildirib ki, hazırda yumurta istehsalı ilə bağlı vəziyyət tam stabilləşib:

“Yumurta qıtlığı, ya bahalaşması olsaydı, camaatın qabağında dayanmaq olmazdı. Problem aradan qaldırılıb. Dükanlar, mağazalar, bazarlar əvvəlki kimi yumurta ilə doludur”.

A.Vəliyev qeyd edib ki, problemin aradan qaldırılması yeni fərələrin hesabına baş verib:

“Yeni fərələr yumurtlamağa başladılar. Bildiyiniz kimi, yaşlı toyuqlar sıradan çıxdıqca, yerlərinə yeni fərələr gəlir. Artıq onlar yumurta verməyə başlayıblar. İstehsal tam həcmdədir”.

Qurum rəsmisi deyib ki, hazırda Azərbaycandan xaricə yumurta idxalı yoxdur və bu çoxdan dayandırılıb:

“Yerli bazarı qoyub, xaricə yumurta göndərə bilmərik. Adama söyərlər. İstehsal daha da artdıqca, bunu bərpa etmək olar”.