Hansı şagirdlərin buraxılış imtahan nəticələri LƏĞV EDİLƏCƏK? – DİM-dən AÇIQLAMA

Aprelin 7-də 11-ci sinif şagirdləri üçün keçirilən buraxılış imtahanında qaydaları (imtahan suallarını çıxarıb yayanlar, imtahanın keçirildiyi məkana telefon keçirənlər və s.)  pozma faktları ilə bağlı hazırda araşdırma aparılır.  Bu barədə Dövlət İmtahan Mərkəzindən (DİM) məlumat verilib.

Bildirilib ki, imtahan suallarının çıxarılması ilə bağlı bir neçə hal baş verib: “İmtahan qaydalarına əməl etməyənlər müəyyənləşdirildkdən sonra onlarla bağlı müvafiq qərarlar veriləcək. Qaydaları pozanlar haqqında şagirdin nə cür qayda pozuntusuna yol verməsinə uyğun olaraq qərar qəbul olunacaq. Məsələn, ötən il imtahanda öz yerinə başqasını göndərmək cəhdi olmuşdu. Bununla bağlı hüquq-mühafizə orqanlarına müraciət olundu və cinayət işi açıldı. Ciddi qayda pozuntuları aşkar olduğu halda bu işin araşdırılması hüquq-mühafizə orqanlarına həvalə olunacaq”.

DİM-dən əlavə olunub ki, imtahanlarda qayda pozuntularına yol verən şagirdlərlə yanaşı, nəzarətçi müəllimlər haqqında da tədbirlər görüləcək: “İmtahanların qaydaları ilə bağlı kifayət qədər məlumatlandırıcı vasitələr, təlimatlar var. Şagirdlərə  tövsiyəmiz odur ki, qayda pozuntusuna yol verməsinlər. Valideynlər də övladlarını bu cür addımlar atmaqdan çəkindirsinlər. İmtahanın əsas şərti hamıya yaradılmış bərabər şəraitdə bilkilərin qiymətləndirilməsidir. Tövsiyə edərdik ki, müəllimlər də öz şagirdlərinə imtahan qaydalarına əməl etmələrinin vacib olduğunu anlatsınlar. Çünki qaydaların pozulması şagirdin, eyni zamanda onun üçün əmək sərf edən müəllim və valideynlərin zəhmətinin hədər getməsinə səbəb olur”.

Qeyd edək ki, Dövlət İmtahan Mərkəzi tərəfindən aprelin 14-də 27 şəhər və rayonda ümumtəhsil müəssisələrinin 11-ci sinif şagirdləri üçün buraxılış imtahanı keçiriləcək.(lent.az)

116 Baxılıb