02 Dekabr 2020 23:02

Saakaşviliyə yeni missiya: QAYIDIR

Gürcüstanın keçmiş prezidenti Mixail Saakaşvili Gürcüstana dönəcəyini deyib.Qeyd edək ki, bir müddət öncə Ukraynada siyasi iddia ilə çıxış edən Saakaşvili nəticədə prezident Poroşenko tərəfindən vətəndaşlıqdan xaric edildi.Artıq onun Ukraynaya girişi mümkün görünmür.  Saakaşvili artıq bir dəfə qadağa qərarını pozaraq Ukraynaya geri dönüb, lakin  hakimiyyətin onu həbs etmək  cəhdləri boşa çıxıb. Hazırkı vəziyyətdə görünən odur ki, Saakaşvilinin Ukraynaya geri dönüşünün mümkünsüzlüyünü artıq özü də anlayır.

“Mən Gürcüstana gələcəm və öz komandamla bütün proqramları reallaşdıracağam.Gürcü xalqını bəlada qoymaram.Prezident seçkisindən sonra bu hakimiyyətə son qoyacağam” – deyə Saakaşvili bildirib.Analitiklər hesab edir ki, Saakaşvilinin yenidən Gürcüstana qayıtmaq istəyi də məhz bununla əlaqəlidir.Ancaq digər versiyalara görə Gürcüstana qayıdıb yenidən aktiv siyasətə qoşulmaq Saakaşviliyə verilən yeni tapşırıqdır.Maraqlıdır, Saakaşvili Gürcüstana niyə qayıdır?

“Harda rəngli inqilab varsa, orda Saakaşvili var”

Politoloq Nəzakət Məmmədova “Cümhuriyət” qəzetinə şərhində Saakaşvilinin Gürcüstana qayıtmaq istəyini bir neçə səbəblə əlaqələndirib:

“Saakaşvili elə bir siyasətçidir ki, nə vaxt, harda peyda olacağını demək çətindir. Harda rəngli inqilab varsa, orada Saakaşvili var. Təbii ki, o, özbaşına hərəkət eləmir.Müəyyən mərkəzlərin təlimatı əsasında fəaliyyət göstərir.Saakaşvilinin həyat yoldaşı holland yəhudisidir və ABŞ-ın keçmiş dövlət katibi Madlen Olbraytın yaxın qohumudur.Onun siyasətə gəlməsində və fəaliyyətində bu amilin rolu böyükdür.Eyni zamanda, hazırda Ukraynada vəziyyət çox gərgindir.Daxili siyasətdə də artıq bir vaxtlar eyni komandada təmsil olunan şəxslər arasında qarşıdurma var və bu tərəflərdən biri elə Saakaşvilidir.Lakin hazırda o, Ukraynada Poroşenko ilə mübarizədə üstün gələ bilməyib və görünür yenidən Gürcüstana dönmək fikrindədir. Gürcüstana dönmək istəməsini səbəblərindən biri də bu ola bilər ki, artıq bu ölkə Saakaşvilinin prezidentliyi dövründəki amerikayönümlü ölkə deyil. Gürcüstanın son dövrlərdə Rusiyavə İranla yaxınlaşma meylləri müşahidə olunur.

Bu işlərdə əsas vasitəçi ölkə Ermənistandır.Ermənistanın indiki prezidenti bildiyimiz kimi biznesmendir, İngiltərədə səfir işləyib və ingilislərin məşhur HSBC bankının Cənubi Qafqazda fəaliyyətini təşkil edib.

Gürcüstanın baş naziri isə keçmiş bankirdir.Onlar arasında bu səbəbdən yaxın münasibətin olması ehtimalı var. Gürcüstanda Saakaşvilidən sonra biznes-maliyyə elitasının hakimiyyətə gəlməsi bu ölkənin İran, Rusiya, Ermənistan və Avropa ilə yaxın əlaqələr yaratmasına səbəb oldu.Ermənistanla İran arasında bildiyimiz kimi azad ticarət zonasının yaradılması barədə razılıq əldə olunub.Bütünlükdə Avrasiya İqtisadi Birliyində altı belə azad ticarət zonası yaradılması nəzərdə tutulur ki, onun biri artıq ermənilərə verildi.Ermənistan Gürcüstana təklif edib ki, buradan istifadə etməklə öz məhsullarını İrana ixrac edə bilər.Əvəzində Rusiya və Ermənistan arasında yeganə yol olan Yuxarı Lars yolunun infrastrukturunun yaxşılaşması, habelə sovet dövrü mövcud olmuş dəmiryolunun bərpasını istəyir.Bütün bunlar İran-Rusiya- Ermənistan ittifaqına Gürcüstanın da cəlb olunmasını şərtləndirən bilər ki, bu da ABŞ-ı narahat etməyə bilməz.Ona görə də, Saakaşvilinin ABŞ tərəfindən yenidən Gürcüstan siyasətinə yönləndirilməsi və ölkənin hazırkı siyasətindən çəkindirmək üçün bu vasitəyə əl atması inandırıcı görünə bilər”.

Nəzakət Məmmədova sonda vurğulayıb ki, Gürcüstan vacib bir ölkədir və ABŞ hazırkı şəraitdə onu itirmək istəməz:

“Odur ki, Saakaşvili kimi ona sadiq bir siyasətçinin Gürcüstanda olması daha vacibdir, nəinki Ukraynada”.    /Cebhe.info/

Paylaş: