30 Noyabr 2020 12:01

“ABŞ Rusiyanı məhv edəcək” – Rus politoloq

Rus politoloq Andrey Piontkovski prezident Vladimir Putinin rəhbərliyi ilə Rusiyanın yaxın 6 ili üçün proqnozlarını açıqlayıb.

Bununla bağlı o, Rusiyanın “Şərhçi” jurnalına müsahibə verib:

– Putinin prezidentliyinin növbəti 6 ilində geridə qalan 18 ildən fərqli nəsə baş verəcək?

– Birincisi, mən 6 rəqəminə qarşıyam. Putin 6 il haqqında düşünmür. O, dəfələrlə bəyan edib ki, onun idarəetməsi ömürlükdür. Mənə elə gəlir, hər bir ukraynalı “Dünya düzəni-2018” filminə baxmalıdır. Bu filmdə Putin nüvə silahından şəxsən istifadə edəcəyi haqqında həvəslə danışır. O, filmdə belə ifadə işlədir: “Rusiyasız dünya bizim nəyimizə lazımdır?”

Ancaq bu, Putinin baxış bucağıdır. Əgər obyektiv inkişafın qanunauyğunluğu haqqında danışsaq, ümid edirəm ki, dünya sağ qalacaq və bu, Putinsiz baş verəcək. Və bu, qarşıdakı 6 ildən də tez baş verəcək.

Bu prezidentlik dövrünün digərlərindən fərqlənməsi məsələsinə gəlincə, bax, Putin bunu özü göstərdi. Nüvə şantajı ilə o, 2014-cü ildən məşğul olur. Məlumdur ki, o, Krımın ilhaqı zamanı nüvə ordusunu tam hazırlıq vəziyyətinə gətirmişdi. Ancaq bu şantaj son günlərdə olduğu kimi bu qədər aşkar və psixoloji olmamışdı. Onun Federal məclisdə çıxışı demək olar ki, nüvə şantajları ilə dolu idi. Bir tərəfdən bu şantajların reallıqla heç bir əlaqəsi yoxdur. Sovet İttifaqı da bu üsuldan tez-tez istifadə edirdi. Digər tərəfdən isə onun yeni nə dediyinə diqqət yetirməliyik. O bildirdi ki, Rusiya ABŞ-ı məhv edə bilər. Bəli, bu, bütün dünyaya və ABŞ-a məlumdur. Buna görə, Kennedi və Xruşşov 1962-ci ildə nüvə müharibəsinin astanasından qayıtdılar.

Lakin Putin vergül qoymağı və ABŞ-ın Rusiyanı da məhv edə biləcəyini deməyi unudur. Suallar yalnız bəzi nüanslardadır: Rusiya 10 dəfə ABŞ-ı, ABŞ isə 15 dəfə Rusiyanı məhv edə bilər. Yaxud əksinə…

Bu çıxış Rusiya ilə Qərb arasındakı gərginliyi daha da artırdı. Amma tərəflər sərhədi keçməyə cəhd etmirlər. Putin də kamikadze deyil. Ancaq təhdid edir: “Əgər mənimlə ciddi məşğul olsalar, dünya yox olacaq”. Çünki bu, hakimiyyətdə qalmağın yeganə üsuludur.

– Siz dediz ki, Putin hələ hazır deyil. Bəs nə vaxt hazır olacaq?

– Əsas “Putin-2018” ilə “Putin-2014”ün fərqinə nəzər salmaq lazımdır. Putin bundan əvvəlki prezidentlik dövründə rus xalqına kiçik qələbələr verməklə ömürlük prezident seçiləcəyini düşünürdü. Əvvəlcə Krım, sonra Novorossiya, daha sonra Narva… Ancaq o, başa düşdü ki, bu, mümkün deyil. Ukraynaya hücumda yanıldı. Və diqqəti yayındırmaq üçün Suriyaya soxuldu. Suriyada bəzi qələbə xəbərlərini açıqladı. Daha sonra ordunun bir hissəsini Suriyadan çıxaracağını dedi. Bu günlərdə ABŞ-la Rusiya ordusu arasında Suriyada toqquşmaların baş verməsi ilə bağlı məlumatlar dərc edilir. Ancaq Rusiya tərəfi hələ də bununla bağlı açıqlama vermir.

– Sizin fikrinizcə, bu ultimatuma Qərb necə reaksiya verəcək? Bu, Putinin hakimiyyətdə qalması üçün bəs edəcəkmi?

– Qərb ona daha heç nə etməyə imkan verməyəcək. Bunu Putin də başa düşdü. Daha heç bir asan qələbə olmayacaq. Qərb həmişə ləng tərpənir. Bunu Hitlerə qarşı fəaliyyətdə də gördük.

Ona görə də Putin digər modellə hərəkət edəcək – mühasirəyə alınmış qala ətrafında balanslaşdırılmış müharibə aparacaq. Ukraynaya gəlincə, o, Qərbin reaksiyasını anlayıb və nə Mariupola, nə də Kiyevə soxulmayacaq. Belə bir hücum onun hakimiyyəti üçün sarsıdıcı ola bilər.

– Siz dediz ki, bu gün Putin Ukraynaya qarşı fəal hücum əməliyyatlarını özünə rəva bilməz. Bəs Donbas və Krımın taleyi necə olacaq?

– Donbas Ukraynaya qaytarılacaq. Burada vəziyyət yaxşılaşacaq. Krımla vəziyyət fərqli olacaq. Onun taleyi Qərblə razılaşdırılacaq.    /teleqraf/

Paylaş: