Ca. Sen 19th, 2019

Lavrovun İrəvan narahatlığı – Paşinyan Kremlə qarşı nə edir?

Rusiya XİN rəhbəri Sergey Lavrovun açıqlaması göstərir ki, həqiqətən də Ermənistanda vəziyyət normal deyil. Ona görə də gərək Rusiya bu istiqamətdə xeyli çalışsın və elə bir taktika qursun ki, Ermənistan adekvat bir subyekt kimi özünü təsdiqləsin.

Turkustan.info bildirir ki, bu sözləri Axar.az-a açıqlamasında politoloq Tofiq Abbasov deyib. O bildirib ki, Ermənistanın siyasi rəhbərliyi səsləndirdiyi bütün bəyanatların əksini həyata keçirir:

“Yəni Paşinyan Rusiyanı tərifləyərək Moskvanı çox sadiq bir müttəfiq kimi qələmə verir. Ancaq reallıqda onun gördüyü işlərin hamısı Rusiyanın əleyhinədir. Birincisi, Ermənistan Qərb istiqamətində çox böyük vədlər verir, Qərbə dair gözləntilərini şişirdilmiş bir tərzdə açıqlayır. O üzdən də hesab edirəm ki, Ermənistanın daxilindəki bu hərc-mərclik davam edərsə, Rusiya-Ermənistan münasibətlərinin gələcək taleyi sual altında qalacaq. Çünki Nikol ümumiyyətlə belə bir ağır vəziyyətdə mövcud şəraitə hakim kəsilə bilmir, digər tərəfdən, onların antiböhran proqramı yoxdur və hələ də xarici siyasətdə yeni vektorların axtarışındadırlar. Təbii ki, Rusiya da bunu görməyə bilməz. Bu baxımdan Rusiyanın Ermənistanla bağlı böyük narahatlığı var. Paşinyan sonuncu dəfə Moskvada görüşlər keçirərək hər şeyin qaydasında olduğunu bildirdi. Ancaq təbii ki, bu, heç də belə deyil. Paşinyan açıq şəkildə olmasa da, Moskvanın hər tələbi ilə razılaşmayacağını, Ermənistanın bərabərhüquqlu münasibətlərin tərəfdarı olduğunu bəyan edib. İndi Nikolun bu məqsədlərinin nə dərəcədə reallaşacağını gələcək göstərəcək. Ancaq bəlli olan yeganə məqam odur ki, Rusiya-Ermənistan münasibətləri istiqamətində böyük boşluqlar var və bu vakuumların da ağrısı tezliklə özünü biruzə verəcək”.

Qeyd edək ki, Rusiya XIN rəhbəri Sergey Lavrov ölkəsinin Köçəryanın həbsi fonunda Ermənistanda baş verənlərdən dolayı narahat olduğunu bildirib.

Paylaş: